1. เอกวิหาริกตฺเถรอปทานํ
[1]
‘‘อิมมฺหิ ภทฺทเก กปฺเป, พฺรหฺมพนฺธุ มหายโส;
กสฺสโป นาม โคตฺเตน, อุปฺปชฺชิ วทตํ วโรฯ
[2]
‘‘นิปฺปปญฺโจ นิราลมฺโพ, อากาสสมมานโส;
สุญฺญตาพหุโล ตาที, อนิมิตฺตรโต วสีฯ
[3]
‘‘อสงฺคจิตฺโต นิกฺเลโส [นิลฺเลโป (สฺยา. ก.)], อสํสฏฺโฐ กุเล คเณ;
มหาการุณิโก วีโร, วินโยปายโกวิโทฯ
[4]
‘‘อุยฺยุตฺโต ปรกิจฺเจสุ, วินยนฺโต สเทวเก;
นิพฺพานคมนํ มคฺคํ, คติํ ปงฺกวิโสสนํฯ
[5]
‘‘อมตํ ปรมสฺสาทํ, ชรามจฺจุนิวารณํ;
มหาปริสมชฺเฌ โส, นิสินฺโน โลกตารโกฯ
[6]
‘‘กรวีกรุโต [กรวีกรุโท (สฺยา. ปี. ก.)] นาโถ, พฺรหฺมโฆโส ตถาคโต;
อุทฺธรนฺโต มหาทุคฺคา, วิปฺปนฏฺเฐ อนายเกฯ
[7]
‘‘เทเสนฺโต วิรชํ ธมฺมํ, ทิฏฺโฐ เม โลกนายโก;
ตสฺส ธมฺมํ สุณิตฺวาน, ปพฺพชิํ อนคาริยํฯ
[8]
‘‘ปพฺพชิตฺวา ตทาปาหํ, จินฺเตนฺโต ชินสาสนํ;
เอกโกว วเน รมฺเม, วสิํ สํสคฺคปีฬิโตฯ
[9]
‘‘สกฺกายวูปกาโส เม, เหตุภูโต มมาภวี [มมาคมี (สฺยา. ปี.)];
มนโส วูปกาสสฺส, สํสคฺคภยทสฺสิโนฯ
[10]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[11]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[12]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกวิหาริโก เถโร อิมา คาถาโย
อภาสิตฺถาติฯ
เอกวิหาริกตฺเถรสฺสาปทานํ ปฐมํฯ
2. เอกสงฺขิยตฺเถรอปทานํ
[13]
‘‘วิปสฺสิโน ภควโต, มหาโพธิมโห อหุ;
มหาชนา สมาคมฺม, ปูเชนฺติ โพธิมุตฺตมํฯ
[14]
‘‘น หิ ตํ โอรกํ มญฺเญ, พุทฺธเสฏฺโฐ ภวิสฺสติ;
ยสฺสายํ อีทิสา โพธิ, ปูชนียา [อีทิโส โพธิ, ปูชนีโย (สฺยา.)] จ สตฺถุโนฯ
[15]
‘‘ตโต สงฺขํ คเหตฺวาน, โพธิรุกฺขมุปฏฺฐหิํ;
ธมนฺโต สพฺพทิวสํ, อวนฺทิํ โพธิมุตฺตมํฯ
[16]
‘‘อาสนฺนเก กตํ กมฺมํ, เทวโลกํ อปาปยี;
กเฬวรํ เม ปติตํ, เทวโลเก รมามหํฯ
[17]
‘‘สฏฺฐิตุริยสหสฺสานิ , ตุฏฺฐหฏฺฐา ปโมทิตา;
สทา มยฺหํ อุปฏฺฐนฺติ, พุทฺธปูชายิทํ ผลํฯ
[18]
‘‘เอกสตฺตติเม กปฺเป, ราชา อาสิํ สุทสฺสโน;
จาตุรนฺโต วิชิตาวี, ชมฺพุมณฺฑสฺส อิสฺสโรฯ
[19]
‘‘ตโต องฺคสตา ตุริยา [ตูรา (สี. ก.)], ปริวาเรนฺติ มํ สทา;
อนุโภมิ สกํ กมฺมํ, อุปฏฺฐานสฺสิทํ ผลํฯ
[20]
‘‘ยํ ยํ โยนุปปชฺชามิ, เทวตฺตํ อถ มานุสํ;
มาตุกุจฺฉิคตสฺสาปิ, วชฺชเร เภริโย สทาฯ
[21]
‘‘อุปฏฺฐิตฺวาน สมฺพุทฺธํ, อนุภุตฺวาน สมฺปทา;
สิวํ สุเขมํ อมตํ, ปตฺโตมฺหิ อจลํ ปทํฯ
[22]
‘‘เอกนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[24]